ખુદ કર્મચારી ગણાવી એક ધુતારો એકદમ નવી બીએમડબલ્યુ કાર લઈને ભાગી ગયો. અહેમદાબાદમાં એક ચોંકાવનારી ઘટના સામે આવી છે, જ્યાં એસજી હાઈવે પર બીએમડબલ્યુ શો-રૂમના કર્મચારી તરીકે પોતાને ઓળખાવનાર એક યુવકે તદ્દન નવી બીએમડબલ્યુ કાર લઈને ભાગી જવાનું આયોજન કર્યું હતું.
ચેન્નાઈથી 12 નવેમ્બરે ટ્રકમાં કુલ 6 બીએમડબલ્યુ કાર સુરત અને અમદાવાદ પહોંચાડવા મોકલવામાં આવી હતી. ટ્રક ડ્રાઈવર રાજકુમાર યાદવે 18 નવેમ્બરના રોજ સુરતમાં 3 કાર સફળતાપૂર્વક ડિલિવર કરી હતી, જ્યારે બાકીની 3 કાર અમદાવાદના મકરબામાં ગેલોપ્સ ઓટો હાઉસ શો-રૂમમાં પહોંચાડવાની હતી. Ahmedabad SG highway new BMW car steal
ટ્રક વહેલી સવારે 5.30 કલાકે શો-રૂમ નજીક પહોંચ્યું, પરંતુ શો-રૂમ બંધ હોવાથી ડ્રાઈવર અને ક્લીનરે આરામ કરવા ટ્રકને રોડ-સાઇડ પર ઉભી રાખી હતી. સવારે 8 વાગ્યે એક અજાણી વ્યક્તિએ ડ્રાઈવરને નજીક આવી, પોતાને શો-રૂમનો કર્મચારી તરીકે ઓળખાવ્યો અને ટ્રાફિકના બહાને ટ્રક બ્લુ લગૂન પાર્ટી પ્લોટ તરફ ખસેડવા કહ્યું.
ત્યાં તેણે ટ્રકમાંથી એક કાર ઉતારી, તમામ કારની ચાવીઓ મેળવી અને દાવો કર્યો કે તે એક કાર શો-રૂમમાં પહોચાડે છે અને બીજી બે કાર માટે પાછો ફરશે. આ યુવક 60.46 લાખની કિંમતની નવી બીએમડબલ્યુ સાથે ભાગી ગયો.
જ્યારે લાંબા સમય સુધી તે ન આવ્યો, ત્યારે ડ્રાઈવરે શો-રૂમમાં પૂછપરછ કરી, જ્યાંથી ખબર પડી કે કોઈ કાર શો-રૂમ સુધી પહોચી જ નહોતી.
પોલીસમાં ફરિયાદ નોંધાઈ
સંપૂર્ણ ઘટનાની જાણકારી મળ્યા બાદ રાજકુમાર યાદવે સરખેજ પોલીસ સ્ટેશનમાં ફરિયાદ નોંધાવી. પોલીસ દ્વારા ઘટનાની તપાસ શરૂ કરવામાં આવી છે અને ચોરી ગયેલી કારને શોધવા સીસીટીવી ફૂટેજ સહિત અન્ય સાધનોનો ઉપયોગ કરવામાં આવી રહ્યો છે.